Britalite Polisier : Eddysen Pachee Desede Swit A Enn Oedem Serebral

Eddysen Pachee inn desede swit a enn oedem serebral. Sa zom 39 an-la, ki ti an detansion polisier depi Vandredi le 23 Mars 2018, ti port bann blesir lor latet, labus ek lazam. Se samem ki otopsi pratike dan lapremidi inn revele azordi, Lendi le 26 Mars 2018.

Eddysen Pachee.

Lekzamen post-mortem mene par Dr Sudesh Kumar Gungadin, sef departman mediko-legal lapolis, asiste par Dr Prem Chamane, dan lopital Dr A. G. Jeetoo. Eddysen Pachee inn desede ver 06hr30 azordi gramaten. Sispe-la inn kondir lopital SSRN, Pamplemousses, ver 18hr Dimans le 25 Mars 2018, apre ki li ti plenyen ar duler.

Eddysen Pachee ti arete Vandredi dan Rivière-du-Rempart, dan lakaz so mama. Bann polisye inn trap li an flagran deli, alos ki li ti pe prepar ladrog sentetik. Li’nn aval plizir doz pu disimil bann prev.

Li’nn osi esay sove. Si bann polisye inn resi ratrap li, enn parmi bann-la inn blese pandan sa lalit-la.

So bann pros, tutfwa, mentenir li’nn viktim britalite polisier. So madam sutenir dayer ki so bann vetman ti ena tas disan. Li kont port plent National Human Rights Commission.