[Video] Arete Pu Tantativ Vol : Bimla Ramloll Transporte Lopital

Li dir li pe sufer ar duler latet. An detansion pu tantativ vol dan bizutri Beryl Rose, Rose-Belle, Bimla Shamloll inn kondir lopital Jawaharlal Nehru pu bann swen.

Li’nn bizen transporte enn premie fwa Samdi le 19 Mai 2018, pu mem rezon. Bimla Ramloll ti, par laswit, regayn so selil.

Bimla Ramloll inn interoze yer, Merkredi le 23 Mai 2018, par Criminal Investigation Division Mahebourg dan kad enn lot tantativ vol dan enn bizutri dan Mahebourg, 2-3 zur avan so arestasion, Vandredi le 18 Mai 2018. Proprieter bizutri-la inn eksplik lapolis li’nn met enn fam, ki paret lus, andeor. Ek kan li’nn ale, li’nn pran lakle ar li.

Video :

Bimla Ramloll supsone pu esay koken bizu dan bizutri Beryl Rose, Vandredi le 18 Mai 2018. Pu pas inapersi, li’nn met enn hijab. Li ti ena enn kuto, enn bom akrimozenn mark Nato, enn fiol ki kontenir kloroform, enn tors elektrik, bann kagul ek legan dan so posesion. So plan inn tutfwa dezue.

Bimla Ramloll osi akize pu trafik inflians dan loktrwa detal minisipalite Quatre-Bornes ek enn eskrokri Rs 753 millions dan zafer Sunkai.